මේ කියන්න යන්නේ අද දවසේ ඇසුණු තවත් එක් විශේෂ ආරංචියක්.
පැසිෆික් සාගරයේ පිහිටි ටොංගා දූපත් රාජ්යය ආසන්නයේ අඟහරුවාදා රික්ටර් මාපකයේ 7.6 ක ප්රබලත්වයකින් යුත් භූමිකම්පාවක් සිදුව ඇති බව ඇමරිකානු භූ විද්යා සමීක්ෂණ ආයතනය (USGS) පවසනවා.
මෙම කම්පනයත් සමඟ එරට අගනුවර අනතුරු ඇඟවීමේ සංඥා නාද වූ නමුත් සුනාමි තර්ජනයක් ඇති නොවන බවයි පසුව වාර්තා කළේ.
ප්රහාරයෙන් සිදුවූ ජීවිත හානි හෝ දේපළ හානි පිළිබඳ මෙතෙක් වාර්තා වී නැහැ.
ටොංගා ගුවන්විදුලි සංස්ථාව (TBC) නිකුත් කළ දර්ශනවල දැක්වෙන්නේ, පසුබිමින් අනතුරු ඇඟවීමේ සංඥා නාද වෙද්දී අගනුවර වන නුකුඇලෝෆා (Nuku'alofa) වැසියන් ගොඩනැගිලිවල වහලවල් මතට රැස්ව සිටින අයුරුයි.
ටොංගා ජාතික ආපදා අවදානම් කළමනාකරණ කාර්යාලය වෙරළබඩ ප්රදේශ සඳහා සුනාමි අනතුරු ඇඟවීමක් නිකුත් කරමින් ජනතාවට වහාම උස් බිම් වෙත හෝ ගොඩබිම දෙසට යන ලෙස උපදෙස් දී තිබුණා.
කෙසේ වෙතත්, පැසිෆික් සුනාමි අනතුරු ඇඟවීමේ මධ්යස්ථානය පසුව ප්රකාශ කළේ, "භූමිකම්පාව පෘථිවිය අභ්යන්තරයේ ඉතා ගැඹුරින් සිදුව ඇති බැවින් සුනාමි තර්ජනයක් නොමැති" බවයි.
ඇමරිකානු භූ විද්යා සමීක්ෂණ ආයතනයට අනුව, මෙම භූමිකම්පාව කිලෝමීටර් 238 ක් (සැතපුම් 148 ක්) පමණ ගැඹුරින් සිදුව ඇති අතර, එහි කේන්ද්රය නෙයියාෆු (Neiafu) නගරයේ සිට කිලෝමීටර් 150 ක් පමණ දුරින් පිහිටා තිබුණා.
