පොලිස් අණ නොතකා ධාවනය කළ සැකකටයුතු වෑන් රථයකට යාපනය කයිට්ස්හිදී පොලීසිය ඊයේ (10) අලුයම කළ වෙඩි තැබීමකින් වෑන් රථයේ රියැදුරු මියගොස් ඇත.
යාපනය වඩුක්කෝට්ටේ ප්රදේශයේ පදිංචි 17 හැවිරිදි තරුණයෙක් මෙසේ මියගොස් ඇතැයි කයිට්ස් පොලීසිය සඳහන් කළේය.
වෑන් රථයේ ඒ වන විට ගමන් කරමින් සිටි දෙදෙනෙකු සැකපිට පොලීසිය අත්අඩංගුවට ගෙන ඇත. යාපනය කොට්ඨාස අපරාධ විමර්ශන කාර්යාංශය භාරයට ඔවුන් දෙදෙනා භාරගෙන කළ ප්රශ්න කිරීමේදී ඔවුන් පවසා ඇත්තේ වී තොගයක් පැටවීමට යමින් සිටියදී මෙම සිදුවීමට මුහුණ දුන් බවය. ඔවුන් කියන ප්රකාශ පිළිගත නොහැකි බව උසස් පොලිස් නිලධාරියෙක් පැවැසීය.
වෑන් රථය පිටුපස ආසන ගලවා ඉවත්කර තිබී ඇත. වෑන් රථයේ ප්රමාණය අනුව ඒ තුළ විශාල වී තොගයත් ප්රවාහනය කළ නොහැකි බවද උසස් පොලිස් නිලධාරියා කීය. පොලිස් අණ නොතකා ඔවුන් මේ ආකාරයට ගමන් කර ඇත්තේ බොහෝ විට වෙනත් කටයුත්තක් සඳහා බව සැක කරන බවද එම උසස් පොලිස් නිලධාරියා වැඩිදුරටත් සඳහන් කළේය.
වෑන් රථය නතර කරන ලෙස පොලීසිය මුලින්ම සංඥා කර ඇත්තේ කයිට්ස් පොලිස් වසමේ අල්ලපිඩ්ඩි හන්දිය ආසන්නයේදීය. එහිදී එම සංඥාවලට අවනත නොවී වෑන් රථය නොනවත්වා මණ්ඩතිව් දෙසට ධාවනය කර ඇතැයි පොලිස් මාධ්ය කොට්ඨාසය සඳහන් කරයි. මෙම අවස්ථාවේදී කයිට්ස් පොලිස් ස්ථානාධිපතිවරයා මණ්ඩතිව් හි පිහිටි පොලිස් මාර්ග බාධකයේ සේවයේ නිරත පොලිස් නිලධාරීන් සම්බන්ධයෙන් අධීක්ෂණය කර අල්පිඩ්ඩි දෙසට ජීප් රථයේ නැඟී ගමන් කරමින් සිට ඇත. පොලිස් අණ නොතකා ධාවනය වෙමින් ඇති වෑන් රථය සම්බන්ධයෙන් ස්ථානාධිපතිවරයාව ඒ අවස්ථාවේදී දැනුවත් කිරීමට අල්පිඩ්ඩිය හන්දියේ සිටි පොලිස් නිලධාරින් පියවර ගෙන ඇතැයිද පොලිස් මාධ්ය කොට්ඨාසය සඳහන් කළේය. ඒ අනුව පොලිස් ස්ථානාධිපතිවරයාද අතරමඟදී සැකකටයුතු වෑන් රථය නතර කර ගැනීමට උත්සාහ දරා ඇත. එහිදී ද පොලීසියට වෙට්ටු දමා වෑන් රථය වේගයෙන් ඉදිරියට ධාවනය වී ඇති බව පොලිස් මාධ්ය කොට්ඨාසය සඳහන් කරයි. එහිදී අහසට වෙඩි තබා රථය නවත්වා ගැනීමට උත්සාහ කර ඇතැයිද පොලිස් මාධ්ය කොට්ඨාසය සඳහන් කළේය.
එම අවස්ථාවේදී ද වෑන් රථය නොනවත්වා පලායන්නට වූ බැවින් වෑන් රථයට වෙඩි තබා ඇති බව ද පොලිස් මාධ්ය කොට්ඨාසය සඳහන් කරයි.
ගයාන් කුමාර වීරසිංහ
යාපනය සමූහ කිත්සිරිගේ ප්රසන්න
