“මගේ පුතාව හැමදාම මම රැකගත්තා. අනේ, එදා උදෙත් මම තංගල්ලේ පන්තියට එක්කගෙන ගිහින් දමලයි ආවේ. පන්ති ඇරිලා ගෙදර එන ගමන් යාළුවෝ එක්ක ඉස්කෝලෙ ක්‍රිකට් ගහන්න ගිහිල්ලා. පිහිනුම් තටාකයට වැටුණු බෝලය ගන්න ගිහින් තමයි පුතාට මේ කරදරේ වෙලා තියෙන්නේ. තාත්තත් නැතුව මං කොච්චර අමාරුවෙන් ද මගේ පුතා හදා ගත්තේ. දෙවියනේ මගේ පුතාට මොකද මේ වුණේ.” දික්වැල්ල විජිත මධ්‍ය මහා විද්‍යාලයේ පිහිනුම් තටාකයේ ගිලී මියගිය ශ්‍රීහාන් විශ්මික ශෂේන්ද්‍ර දේශප්‍රිය ඉලංකනාදන් (17) සිසුවාගේ මව කඳුළු සලමින් පැවසුවාය.
‘ජයත්‍රී’ නිසල උයන, දොඩම්පහළ, දික්වැල්ල ලිපිනයේ පදිංචි ශ්‍රීහාන් දරුවන් තිදෙනකුගෙන් යුත් පවුලේ දෙවැන්නාය. ඔහුට වැඩිමහල් සොහොයුරියක් සහ බාල සහෝදරියක් සිටිති. වෛද්‍යවරයකු වූ ශ්‍රීහාන්ගේ පියා මියගොස් වසර එක හමාරක් පමණ වන අතර, පවුලේ බර කරට ගෙන දරුවන් රැක බලාගෙන ඇත්තේ ශ්‍රීහාන්ගේ මව වූ ඊ. බී. ජී. අනූෂා නිලන්ති (49) මහත්මියයි.
සිය ස්වාමිපුරුෂයා හදිසියේ මියයෑමෙන් පසු දරුවන් තිදෙනා රැක බලා ගත් අනූෂා, ශ්‍රීහාන් පාසලට යෑමේදීත්, උපකාරක පන්තිවලට යෑමේදීත් ඔහු සමඟ නිරන්තර ගමන් කොට ඇත්තේ දරුවාට තිබූ අසීමිත ආදරය නිසාය. එතරම් ආදරෙන් රැකබලා ගත් තම පුත්‍රයා හදිසියේ වෙන්ව යෑම මවකට දරා ගැනීම කොතරම් අපහසු ද?
දික්වැල්ල විජිත මධ්‍ය මහා විද්‍යාලයේ 12 ශ්‍රේණියේ ජීව විද්‍යා අංශයේ ඉගෙනුම ලබමින් සිටි ශ්‍රීහාන් මියගිය දින පෙරවරු 8.30ට පමණ තංගල්ලේ පැවති උපකාරක පන්තියකට සහභාගි වී සවස දෙකයි තිහට පමණ ලද විවේක කාලයේ සිය වැඩිමහල් සහෝදරියට දුරකතන ඇමතුමක් දී පවසා ඇත්තේ නිවෙසේ ඇති ක්‍රිකට් පිත්ත සහ බෝලය එන යහළුවන් දෙදෙනාට දෙන ලෙසයි. ඒ අනුව සහෝදරිය විසින් නිවෙසට පැමිණි යහළුවන් දෙදෙනාට ක්‍රිකට් පිත්ත සහ බෝලය දී ඇති අතර, ඔවුන් එය රැගෙනවිත් ක්‍රිකට් ක්‍රීඩාවේ යෙදෙමින් සිට ඇත. සවස හතරයි තිහට පමණ පන්ති නිමවීමෙන් පසු ශ්‍රීහාන් ද විජිත විද්‍යාලයට පැමිණ යහළුවන් සමඟ ක්‍රිකට් ක්‍රීඩාවේ යෙදී සිට තිබේ.
ඒ අතර සවස හයත්, හයයි තිහත් අතර කාලයේ බෝලය ආසන්නයේ තිබූ පිහිනුම් තටාකයට වැටී තිබේ. බෝලය එලෙස තිබියදී නිවෙසට යමු යැයි යහළුවන් යෝජනා කරද්දී ඇඳ සිටි කමිසය ගලවා ශ්‍රීහාන් තටාකයට පැන බෝලය ගැනීමට උත්සාහ දරා ඇත. මඳ දුරක් පිහිනමින් සිටියදී ඔහු දියේ ගිලෙන්නට යමින් අපහසුවෙන් සිටින අයුරු දැක ඇති යහළුවන් දෙදෙනකු ද ඔහු බේරා ගැනීමට තටාකයට පැන ඇත. එහිදී ඔවුන් ද ගිලී ඇත. පසුව ඔවුන් අපහසුවෙන් ඉහළටවිත් බැම්මේ එල්ලී ගොඩට ඒමට උත්සාහ දරද්දී එම මොහොතේ එහි සිටි යහළුවන් විසින් අතින් අල්ලා උඩට ඇද ජීවිතය බේරා ගත්ත ද ශ්‍රීහාන් දියේ ගිලී තටාකයේ පතුලෙහි රැඳී ඇත.
එහි රැඳී සිටි අනෙකුත් තරුණයන්ගේ කෑගැසීමත් සමඟ දිව ආ විද්‍යාලයේ ගුරු නිවාසයේ සිටින නියෝජ්‍ය විදුහල්පතිවරයා කෑගසා ආරක්ෂක නිලධාරියා වහාම එම ස්ථානයට ගෙන්වාගෙන තිබේ. එතැනට පැමිණි ආරක්ෂක නිලධාරියා තටාකයට පැන තටාකයේ ගිලී සිටි ශ්‍රීහාන් මතුපිටට ගෙනැවිත් දික්වැල්ල බතීගම දිසා රෝහලට රැගෙන ගිය ද ඔහුගේ ජීවිතය බේරා ගැනීමට නොහැකිවී තිබේ.
“අපේ මල්ලිට ගොඩක් යාළුවෝ හිටියා. ඒ නිසා අපි නිතර එයා ගැන හොඳට හොයා බැලුවා. එදා උදෙත් අම්මා, මල්ලි තංගල්ලේ පන්තියට එක්කගෙන ගිහින් 11.30 වෙනකල් ඉඳලා ගුරුවරුන්ට මල්ලි භාර දීලා තමයි ගෙදර ආවේ. මල්ලි පන්තියේ ඉන්න අතරතුර මට විටින්විට කතා කළා. හතරහමාරට පන්තිය අවසන් වුණාට පසු මට කතා කර අද මහන්සිත් නෑ, බඩගිනිත් නෑ ටිකක් සෙල්ලම් කරලා එන්නම් කීව්වා. එහෙම ඇවිත් තමයි විජිත විද්‍යාලයට ගිහින් සෙල්ලම් කරලා තියෙන්නේ. අපි ආදරෙන් කොච්චර ආරක්ෂාව දුන්නත් අපේ මල්ලි අපව දාලා ගියා.”
ශ්‍රීහාන්ගේ වැඩිමහල් සහෝදරිය වූ ලංකිකා ඉලංකනාදන් (22) හැඬූ කඳුළින් පැවසුවාය.
ශ්‍රීහාන්ගේ මරණය පිළිබඳ හදිසි මරණ පරීක්ෂණය දික්වැල්ල හදිසි මරණ පරීක්ෂක ජයන්ත සමරසිංහ මහතා විසින් පවත්වා ඇති අතර, මරණය පිළිබඳ පශ්චාත් මරණ පරීක්ෂණය පැවැත්වූ මාතර මහ රෝහලේ අධිකරණ වෛද්‍ය නිලධාරි ඒ. එස්. සෙනෙවිරත්න මහතා විසින් නිගමනය කර තිබුණේ දියේ ගිලීමෙන් සිදු වූ මරණයක් බවයි.
හදිසි මරණ පරීක්ෂණයේදී සහ පශ්චාත් මරණ පරීක්ෂණයේදී දික්වැල්ල පොලිස් ස්ථානාධිපති, ප්‍රධාන පොලිස් පරීක්ෂක සමරසිංහ මහතාගේ උපදෙස් පරිදි පොලිස් සැරයන් (62132) තිලක මහතා විසින් සාක්ෂි මෙහෙයවා ඇත.
ගන්දර සමූහ – ජයසිරි පේදුරුආරච්ච්
