බිංගිරිය, වැල්ලරාව ප්‍රදේශයේදී අවුරුදු එකයි මාස තුනක් වයසැති සිඟිති දැරියක පාළු නිවසකට රැගෙන ගොස් අමානුෂික ලෙස වද හිංසා පමුණුවා, පහර දී පොළොවේ ගැසීමේ චෝදනාව මත තරුණයන් දෙදෙනෙකු බිංගිරිය පොලිසියේ ළමා හා කාන්තා කාරියාංශයේ නිලධාරීන් විසින් පෙරේදා (18) අත්අඩංගුවට ගෙන තිබේ. මෙම තරුණයන්ගෙන් එක් අයෙකු අදාළ දැරියගේ මව සමග අනියම් සබඳතාවක් පැවැත්වූ තැනැත්තා වන අතර, අනෙකා එම අපරාධයට ආධාර අනුබල දුන් ඔහුගේ මිතුරෙකි.
මෙම කෘර ප්‍රහාරයෙන් බරපතළ තුවාල ලැබූ සිඟිත්තිය පළමුව බිංගිරිය රෝහලටත්, පසුව හලාවත දිස්ත්‍රික් මහ රෝහලටත් ඇතුළත් කර ඇත. එහෙත් තත්ත්වය අසාධ්‍ය වීම හේතුවෙන් ඇය මේ වන විට කොළඹ ජාතික රෝහලේ දැඩිසත්කාර ඒකකයට මාරු කර යවා ඇති බව පොලිස් නිලධාරියෙක් සඳහන් කළේය. මෙසේ අත්අඩංගුවට පත්ව ඇත්තේ හිරුවල්පොළ ප්‍රදේශයේ පදිංචි 23 හැවිරිදි කම්කරු වෘත්තියේ නියුතු තරුණයෙකු සහ කඳුරුවැව ප්‍රදේශයේ 21 හැවිරිදි කුලී වැඩ කරන්නෙකු බව පොලිසිය හඳුනාගෙන තිබේ.
පොලිසිය අනාවරණය කරගෙන ඇති තොරතුරු අනුව, 23 හැවිරිදි ප්‍රධාන සැකකරු, දැරියගේ මව සමග මාස පහක පමණ කාලයක සිට අනියම් ඇසුරක් පවත්වාගෙන ගොස් ඇත. එම කාන්තාව සමග නවාතැන්පල සහ හෝටල් වෙත යන අවස්ථාවලදී මෙම කුඩා දැරිය ද රැගෙන යාම, ඔවුන්ගේ සම්බන්ධතාවයට බාධාවක් ලෙස සැකකරු දැක ඇති බව වාර්තා වේ. එම බාධාව ඉවත් කර ගැනීමේ අරමුණින් දැරිය ඝාතනය කිරීමට තැත් කර ඇති බවට සැකකරු පාපොච්චාරණය කර ඇතැයි පොලිසිය පවසයි. පුදුම සහගත කරුණ නම්, මෙම 23 හැවිරිදි අනියම් සැමියා, අදාළ කාන්තාවගේ නීත්‍යානුකූල සැමියාගේම හොඳම මිතුරා වීමයි.
සැකකාර තරුණයා මෙම සිඟිත්තිය නිවසින් රැගෙන ගොස් ඇත්තේ දරුවන් නොමැතිව දැඩි කනස්සල්ලෙන් පසුවන හිතවත් කාන්තාවකට පැය කිහිපයකට දරුවා සුරතල් කිරීමට දෙන බව පවසමිනි.
සිය හොඳම මිතුරා කළ මෙම ඉල්ලීම සහ දරුවන් නොමැති කාන්තාවකගේ දුක ගැන සිතා දැරියගේ දෙමාපියන් (මව සහ පියා) දරුවා රැගෙන යාමට අවසර දී තිබේ. තම බිරිඳ සහ හොඳම මිතුරා අතර පැවති මෙම අනියම් සම්බන්ධය පිළිබඳව දැරියගේ පියා ද දැනගෙන ඇත්තේ මෙම බිහිසුණු සිදුවීමෙන් පසුව බව පොලිසිය සඳහන් කරයි.
මෙලෙස රැගෙන ගිය දැරිය බිංගිරිය ප්‍රදේශයේ පාළු නිවසක රඳවා, අනෙක් සැකකාර මිතුරා ද සමග එක්ව කෝටුවලින් පහර දී, වද හිංසා පමුණුවා, අනතුරුව ඔසවා පොළොවේ ගසා ඇති බව සැකකරුවන්ගෙන් කළ ප්‍රශ්න කිරීම්වලදී හෙළිවී තිබේ. තවද, මෙම සැකකරුවන් දෙදෙනා විසින් සිඟිත්තිය අපයෝජනයකට ද ලක් කර ඇති බව පොලිස් පරීක්ෂණවලින් හෙළි වී ඇතැයි කියැවේ. කුලියාපිටිය සහකාර පොලිස් අධිකාරි (I) එච්.පී.වයි.ඩබ්ලිව්. හේරත් මහතාගේ උපදෙස් මත, බිංගිරිය පොලිසියේ ළමා හා කාන්තා කාර්යාංශයේ ස්ථානාධිපතිනි පොලිස් පරීක්ෂිකා සුපුනි ශෂි ප්‍රභා මහත්මිය ඇතුළු කණ්ඩායමක් විසින් මෙම අත්අඩංගුවට ගැනීම සිදු කර ඇත.
