හුංගම රන්න වාඩිගල වලව්වේ, මහත්තයාගේ ආර ප්‍රදේශයේ නි‍ෙවසක රැඳීසිටි යුවළක් ඊයේ (07) අලුයම කපා කොටා ඝාතනය කර තිබේ.
මුහුණු වසාගත් පස් දෙනකුගෙන් සමන්විත පිරිසක් තියුණු ආයුධ රැගෙන එම යුවළ නවාතැන් ගෙන සිටි නි‍ෙවසට කඩාවැදී අමානුෂික ලෙස ඔවුන් කපාකොටා ඝාතනය කර තිබේ. මේ පස්දෙනාගෙන් සිවු දෙනකුම ඊයේ (07) දහවල් වන විට හුංගම පොලීසිය විසින් අත්අඩංගුවට ගනු ලැබීය.
මෙසේ ඝාතනය කර ඇත්තේ අංක 130/4, බටඅත උතුර , හුංගම ලිපිනයේ පදිංචිව සිටි විජේසේකර ආරච්චිගේ පසිදු හේෂාන් නොහොත් ‘බෝ පසිදු’ නමැති 28 හැවිරිදි ධීවරයකු සහ ඔහුගේ අනියම් බිරියවූ 26 හැවිරිදි ඉමාෂා මධුභාෂිණී නමැති කාන්තාවකි. ඇය කුඩාවැල්ල ප්‍රදේශයේ පදිංචිකාරියක් බව පොලීසිය පැවසීය.
සිද්ධිය සම්බන්ධයෙන් අත්අඩංගුවට ගෙන ඇත්තේ ඝාතනයට ලක්වූ කාන්තාවගේ මින්පෙර අනියම් සැමියකුව සිටි අයෙකි.
ඝාතනය වූ පුද්ගලයාගේ හිස කඳින් වෙන්වන ලෙස තියුණු ආයුධයකින් පහරදී ඇති අතර කාන්තාවගේ ගෙල ප්‍රදේශය ද තියුණු ආයුධයකින් කපා තිබේ. මොවුන් නවාතැන්ගෙන සිටි නි‍ෙවසේ සිද්ධිය වන විට ගෙහිමි කාන්තාව සහ ඇයගේ දරු තිදෙනා සිට ඇති අතර, නි‍ෙවසේ හිමිකරු හෙරොයින් ජාවාරම් කිරීමේ නඩුවකට බන්ධනාගාරගතව සිටින බව පොලීසිය සඳහන් කරයි.
අලුයම් කාලයේදී ගෙහිමි කාන්තාව වැසිකිළි යෑමට නි‍ෙවසින් පිටත පැමිණිවිට අඳුරේ සැඟවී සිටි ඝාතන සැකකරුවන් ඇයගේ බෙල්ලෙන් අල්ලාගෙන ඇයව නිහඬ කර ඇත. ඒ වනවිට නි‍ෙවස තුළ සිටි කාන්තාවක් ද නි‍ෙවසේ පිටුපස දොර ඇරගෙන වැසිකිළි යෑමට එළියට පැමිණ තිබේ.
ඒ සමඟම ඇය අල්ලා ගත් ඝාතකයන් නිවෙස තුළට ඇදගෙන ගොස් කපාකොටා මෙම ඝාතන සිදුකර පලා ගොස් තිබේ. ඝාතනයට ලක්වූ කාන්තාව මීට දින හතරකට පමණ පෙර මෙම නි‍ෙවසට පැමිණ ඇත. විජේසේකර ආරච්චිගේ පසිදු හේෂාන් (28)නොහොත් ‘බෝ පසිඳු’ නමැති නමැත්තා අය පැමිණ ඇත්තේ පසුගිය 06 වැනිදා සවස බව ගෙහිමි කාන්තාව පොලීසියට පවසා තිබේ.
ඝාතනයට ලක්වූ බෝ පසිඳු නමැත්තා ඝාතනයට ලක්වූ කාන්තාවගේ පෙර සිටි අනියම් සැමියාව 2024 වර්ෂයේ මාර්තු මාසයේදී වෙඩි තබා ඝාතනය කිරීමට අදාළව සැකකරුවකු ලෙස රක්ෂිත බන්ධනාගාරගත කර සිට අධිකරණයෙන් ඇප ලබා පැමිණ සිටි අයෙකි. පසුව මීට මාස හයකට පමණ පෙර නැවතත් මත්ද්‍රව්‍ය සම්බන්ධ සිද්ධියකට හුංගම පොලීසිය විසින් අත්අඩංගුවට ගෙන අධිකරණයට ඉදිරිපත් කිරීමෙන් පසු ඇප ලබා නිදහස්ව පැමිණි අයෙකි.
බෝ පසිඳු සහ ඔහුගේ අනියම් බිරිය මත්ද්‍රව්‍ය ජාවාරමට සම්බන්ධව ද අධිකරණයෙන් චෝදනා ලැබ ඇප පිට සිටි අය බව පොලීසිය පවසයි.
එමෙන්ම ඝාතනයට ලක්වූ ඉමාෂා මධුභාෂිණි (27) නමැති කාන්තාවගේ මීට පෙර අනියම් සැමියා ලෙස සිටි අපරාධ රැසකට සම්බන්ධ සමරවික්‍රම කඩවත ආරච්චිගේ සමන්කුමාර නොහොත් ‘බින්දු’ ඇතුළු පුද්ගලයන් පස් දෙනකු විසින් මේ ඝාතන සිදුකර ඇති බව පොලීසිය අනාවරණය කර තිබේ.
ඒ අනුව රන්න ප්‍රදේශයේ නි‍ෙවසක සැඟවී සිටියදී අදාළ ප්‍රධාන සැකකරු වන ‘බින්දු’ නමැති පුද්ගලයා හුංගම පොලීසිය හා අම්බලන්තොට පොලිස් විශේෂ කාර්ය බළකා මධ්‍යස්ථානයේ නිලධාරීන් විසින් සිදු කළ මෙහෙයුමකදී අත්අඩංගුවට ගෙන තිබේ. එමෙන්ම අදාළ සැකකරුගෙන් කළ ප්‍රශ්න කිරීමකින් අනතුරුව මෙම ඝාතනය සම්බන්ධ බින්දු නමැති ප්‍රධාන සැකකරුගේ මල්ලි සහ තවත් දෙදෙනකු තංගල්ල කොට්ඨාස අපරාධ හා දුෂණ මර්දන ඒකකයේ නිලධාරීන් විසින් අත්අඩංගුවට ගනු ලැබීය.
අනෙක් සැකකරු ද අත්අඩංගුවට ගැනීමට මේ වනවිට පොලිස් කණ්ඩායම් කිහිපයක් පරීක්ෂණ පවත්වනු ලැබේ.
ඝාතනය සිදුවූ නි‍ෙවසේ කාන්තාවගේ සැමියා ද මත්ද්‍රව්‍ය චෝදනාවකට රක්ෂිත බන්ධනාගාරගත කර ඇත. එම තැනැත්තා මෙම ඝාතනය සිදු කළ ‘බින්දු’ නමැත්තාගේ මිතුරකු බව ද පොලීසිය පවසයි. කෙසේ නමුත් නි‍ෙවසේ හිමිකාරිය පවසන්නේ ඊයේ (06) රාත්‍රී දොළහයි තිහට පමණ පස් දෙනකුගෙන් සමන්විත කණ්ඩායමක් මෙම ඝාතනයට පැමිණි බවයි.
ඔවුන් මුහුණු ආවරණය කරගෙන සිටි බව ඇය මුලින් ප්‍රකාශ කළත් පසුව ‘බින්දු’ නමැති සැකකරු හඳුනාගත් බව ඇය පොලීසියට පවසා තිබේ. කෙසේ නමුත් සිද්ධිය සම්බන්ධව හුංගම පොලීසිය සහ තවත් පොලිස් කණ්ඩායම් කිහිපයක් පරීක්ෂණ ආරම්භ කර තිබේ.
මෙම ඝාතන සම්බන්ධයෙන් මහේස්ත්‍රාත් පරීක්ෂණය අගුණකොළපැලැස්ස මහේස්ත්‍රාත් අධිකරණයේ, මහේස්ත්‍රාත් එරන්දි හේවාවසම් මහත්මිය විසින් සිදුකරනු ලැබුවාය. ස්ථානීය අධිකරණ වෛද්‍ය පරීක්ෂණය තංගල්ල රෝහලේ විශේෂඥ අධිකරණ වෛද්‍ය නිලධාරි රුවන් නානායක්කාර මහතා විසින් සිදු කරන ලදි.
තංගල්ල කොට්ඨාස භාර ජ්‍යෙෂ්ඨ පොලිස් අධිකාරි නිපුණ දෙහිගම මහතාගේ උපදෙස් පරිදි හුංගම පොලීසිය සිද්ධිය ගැන පරීක්ෂණ පවත්වයි.
අම්බලන්තොට සමූහ – රාහුල් සමන්ත හෙට්ටිආරච්චි, තංගල්ල සමූහ – පද්මසිරි ගාර්දියවසම්, අම්බලන්තොට සමූහ – රාහුල් සමන්ත හෙට්ටිආරච්චි, සූරියවැව විශේෂ – නුවන් ජයසේකර
