ඔබේ වාහනය ජලයේ ගිලුණොත් ක්ෂණිකව ජීවිතය බේරාගන්නේ කොහොමද..?

ඔබේ වාහනය ජලයේ ගිලුනොත් ජීවිතය බේරාගන්න නම් එකවරම කළ යුත්තේ මොකක්ද?

මේ ගැන හරියට නොදැන සිටියොත් සමහරක් විට විනාඩි කිහිපයක් ඇතුළත ඔබේ ජීවිතය පවා අහිමි වන්නට පුළුවන්. 

පවතින කාලගුණ තත්ත්වය හේතුවෙන් බොහෝමයක් රථ වාහන මේ වන විට ඇලමාර්ග, ගංගා ආදියේ ගසාගෙන යනවා. ඒ වගේ අවස්ථාවකදී ඔබේ ජීවිතය බේරා ගන්න නම් මෙන්න මේ කියන දේවල් කරන්න ක්ෂණිකව ඔබට ක්‍රියාත්මක වෙන්න සිද්ධ වෙනවා.

වාහනය මෙලෙස ජල පහරකට හසුවුවහොත් වාහනය ඇතුළත ජලයෙන් පිරී යන්නට පෙර තත්පර හැටක පමණ කාලයක් තුළ ඔබට ඔබගේ ජීවිතය බේරා ගැනීමට හැකියාව පවතිනවා. එවැනි අවස්ථාවන්හිදී කලබලයට කිසිසේත්ම මෙවැනි ක්‍රියා කරන්නට එපා.

පළවෙනුවෙන්ම ජලයෙන් පිරී ඇති වාහනයේ දොර අරින්නට උත්සාහ කරන්න එපා. මොකද ජලයේ පවතින පීඩනයත් එක්ක ඔබට ඒ ක්‍රියාව කරගන්න හැකියාවක් නැහැ.

මෙවැනි අවස්ථාවකදී ඔබ ප්‍රථමයෙන්ම කළ යුත්තේ ආරක්ෂක බඳපටිය ඉවත් කර ගැනීමයි. මොකද ඔබ මේ ජල කඳෙන් ගැලවීමට නම් නිදහස් විය යුතුයි. බොහෝ දෙනෙක්ට අවාසනාවන්ත ඉරණමක් අත්වුණේ මෙය නොදැන සිටි නිසාවෙන්නට පුළුවන්. මෙවැනි අවස්ථාවකදී වාහනයෙන් එළියට පැමිණීමට නම් ඔබ ජනෙල් විවර කිරීම අත්‍යවශ්‍ය වෙනවා. ජලය යට දී පවා කෙටි කාලයකට Power Windows ක්‍රියාත්මක වන බව ඔබ දැන සිටියාද.?

මෙවැනි අවස්ථාවකදී කිනම් හෝ හේතුවක් මත ජනේලයක් විවර වන්නේ නැත්නම් ඔබ, අතට හසුවන දැඩි යමකින් පහර දී ජනේලය කඩන්න. වඩාත්ම වැදගත් දේ වන්නේ ඔබ මෙහිදී ඉලක්ක කර ගත යුත්තේ ජනේලයක මැද නොවේ ජනේලයේ කොණකින් මේ සිදුරු කිරීම කල යුතු වෙනවා.

මෙසේ විවර කරගත් ජනෙල් කවුළුවලින් ප්‍රථමයෙන්ම කුඩා දරුවන් වාහනය තුළ සිටී නම් ඔවුන්ව පිට කරන්න. ඉන්පසුව ඔබ මතක තබා ගත යුත්තේ සම්පූර්ණයෙන්ම මෝටර් රථය තුළට ජලය පිරී පවතී නම් අන්න ඒ අවස්ථාවලදී පමණක් මෝටර් රථයේ දොර හැර ඔබට එළියට යා හැකි බවයි.

මොකද එවැනි අවස්ථාවලදී ඇතුළත සහ පිටත පීඩනය සමාන වී දොර සම්පූර්ණයෙන්ම ඇර ගැනීමට හැකියාව ලැබෙනවා. නමුත් එය ඔබ කල යුතු වන්නේ වෙනත් විකල්ප නැත්නම් අවසාන තත්පරයේදී බව සිහි තබා ගන්න. ගංවතුර වැනි අපැහැදිලි ජලයක ඔබට මතුපිට නොපෙනුනත් ඔබ කෙසේ හෝ මෙම වතුරෙන් ගොඩ ඒමට නම් එහි බුබුළු සහිත දිශාව සොයාගෙන ඒ ඔස්සේ ගොඩට පැමිණිය යුතුයි.

එය එසේ පවසන්නට හේතුව වන්නේ සෑම විටම බුබුළු නැගෙන්නේ ජලයේ මතුපිට දෙසට වීම නිසයි. ඉතින් බොහෝ දෙනෙකුට ජීවිත අහිමි වන්නේ මේ සරල ක්‍රම ඔවුන් නොදැන සිටි නිසා වන්නට පුළුවන්. මෙවැනි අවස්ථාවකදී කඩිනමින් මෙම පියවර ගතහොත් ඔබට ඔබගේ ජීවිතය ආරක්ෂා කරගැනීමට හැකියාව පවතිනවා.