ඇගේ මරණය ගැන බොහෝ දෙනා කතා කළේ ඒ වුණු සිදුවීම ඒ තරම්ම කෘර නිසා බව කියන්න පුළුවන්. මේ අන්න ඒ සිද්ධිය ගැන ඇසුණු තවත් එක් විශේෂ ආරංචියක්.
නිදි යහනේදී තම බිරිය ඝාතනය කළ බවට සැකපිට දඹුල්ල පොලිසිය අත්අඩංගුවට ගත් සැමියා ලබන 29 දින දක්වා රක්ෂිත බන්ධනාගාර ගතකරන ලෙස දඹුල්ල දිසා විනිසුරු නිලන්ත විමලරත්න ඊයේ (16) නියෝග කළා.
මෙසේ බන්ධනාගාර ගතවූයේ චාමර දන්දෙනිය නමැති එක්දරු පියෙක්.
නිදි යහනේ මියගොස් සිටි රාජ්‍ය සේවිකාවගේ මරණය ඝාතනයක් බව සිදු කරන ලද පශ්චාත් මරණ පරීක්ෂණයේදී හෙළි වීමත් සමඟ ප්‍රකාශ ලබා දීමට මරණ පරීක්ෂණයට පැමිණ සිටි ඇයගේ සැමියා පසුගිය දා සැකපිට අත්අඩංගුවට ගත් බව දඹුල්ල පොලීසිය කියයි.
මෙසේ ඝාතනයට ලක්වී ඇත්තේ දඹුල්ල, තිත්තවැල්ගොල්ල ප්‍රදේශයේ පදිංචි තාරුකා කෞෂල්‍යා නිස්සංක (34) නමැති එක් දරු මවකි. ඇය ගලේවෙල කලාප අධ්‍යාපන කාර්යාලයේ කළමනාකරණ සේවා නිලධාරිනිය ලෙස සේවය කරමින් සිටියාය.
දඹුල්ල, තිත්තවැල්ගොල්ල ප්‍රදේශයේ නි‍ෙවසක කාමරයක් තුළ පසුගිය දහතුන් වැනි දින කාන්තාවක් නිදි යහනේ සිටියදී මියගොස් ඇති බව පොලීසියට තොරතුරු ලැබී තිබිණි. ඇයගේ සැමියා පොලීසියට ප්‍රකාශ කොට තිබුණේ තම බිරිය විභාගයක් සඳහා පාඩම් කරමින් සිට සවස හතරට පමණ නින්දට ගිය බවත් රාත්‍රී නවයට පමණ අවදි කරවන ලෙස දැනුම් දුන් බවය.
ඒ අනුව රාත්‍රියේ බිරිය අවදි කිරීමට ගියද ඇය අවදි නොවීම නිසා අසනීප තත්ත්වයක් ඇතැයි සිතා 1990 ගිලන් රථ සේවය සේවයට ඇමතුමක් ලබා දුන් බවද ඔහු පොලීසියට ප්‍රකාශකොට තිබිණි. ගිලන් රථ සේවාවේ පිරිස පැමිණ තම බිරිය මියගොස් ඇති බව ප්‍රකාශ කළේ යැයි ඔහු වැඩිදුරටත් පොලීසියට කියා ඇත.
කෙසේ වෙතත් මෙම මරණය පිළිබඳ බරපතළ සැක කළ දඹුල්ල මූලස්ථාන පොලිස් පරීක්ෂක සුගත් විජේසුන්දර මහතා පොලිස් නිලධාරීන්ට උපදෙස් ලබා දුන්නේ මෙම මරණය පිළිබඳව විධිමත් පරීක්ෂණයක් වෙනත් සිද්ධීන් ඔස්සේ පවත්වන ලෙසය. ඒ අනුව දඹුල්ල පොලීසිය මෙම මරණය සම්බන්ධයෙන් දඹුල්ල මහේස්ත්‍රාත් අධිකරණයට කරුණු වාර්තා කරමින් පශ්චාත් මරණ පරීක්ෂණයක් පැවැත්වීමට අවසර ලබාගෙන තිබිණි. පශ්චාත් මරණ පරීක්ෂණය 15 දින පෙරවරුවේ දඹුල්ල රෝහලේදී විශේෂඥ අධිකරණ වෛද්‍ය කේ.එන්.සී. සේනාරත්න මහතා පැවැත්වීය. එහිදී මරණයට හේතුව ලෙස වෛද්‍යවරයා සඳහන්කොට ඇත්තේ හිසට බරපතළ හානි සිදුව හිසේ අභ්‍යන්තරයට ලේ වහනය වීමෙන් මෙම මරණය සිදු වී ඇති බවයි.
විශේෂඥ අධිකරණ වෛද්‍ය නිලධාරිවරයාගේ තීන්දුව ලැබීමත් සමඟ ප්‍රකාශ සටහන් කරගැනීම සඳහා අධිකරණ වෛද්‍ය භූමියට පැමිණ සිටි මියගිය කාන්තාවගේ සැමියා සැකපිට අත්අඩංගුවට ගැනීමට එහි පරීක්ෂණ මෙහෙයවමින් සිටි දඹුල්ල පොලිසියේ උප පොලිස් පරීක්ෂක ඩබ්ලිව්.එච්.එම්. නිශාන්ත හේරත් මහතා පියවර ගෙන තිබිණි. දඹුල්ල මූලස්ථාන පොලිස් පරීක්ෂක සුගත් විජේසුන්දර මහතා ඇතුළු පොලිස් කණ්ඩායමක් පරීක්ෂණ සිදු කරති.
දිනමිණ පුවත්පත ඇසුරෙන්..
