දවස් 2කට ගෑස් පිපිරීම් 20ක්



ඊයේ සහ අද මේ දක්වා ගෘහස්ත ගෑස් සිලින්ඩරවල ගෑස් කාන්දුවීම හේතුවෙන් පුපුරා යාම් 20ක් වාර්තා වී ඇති බව පොලිසිය පවසයි.

මින් සිදුවීම් පහළොවක් සිදුව ඇත්තේ ඊයේ දිනයේ දී ය.

බිබිල, ළිඳකුඹුර සමෘද්ධි බැංකුවේ ආපනශාලාවේ මුළුතැන්ගෙයි ගෑස් කාන්දුවකින් පසු ගින්නක් හටගෙන තිබේ.

ආපනශාලා හිමිකරු සඳහන් කළේ, ලිප දැල්වීමෙන් මිනිත්තු කිහිපයකට පසු යම් පිපිරීමක් සිදුවූ බවය.

මාතර, නාවිමන ප්‍රදේශයේ නිවසක තිබූ ගෑස් ලිපක් ද ඊයේ (29) රාත්‍රියේ පිපිරීමකට ලක්වී තිබුණි.

මේ අතර මීරිගම, තිලිණගම ප්‍රදේශයේ නිවසක තිබුණු ගෑස් ලිපක් ද ඊයේ රාත්‍රියේ පුපුරා ගොස් ඇති බවට වාර්තා වුණි.

දියතලාව, දොඩම්වත්ත, හෙලවත්ත ප්‍රදේශයේ නිවසක ක්‍රියාවිරහිත කර තිබූ ගෑස් ලිපක් ද පිපිරීමකට ලක්වී තිබේ.

ඇඹිලිපිටිය, කණමැදිආර ප්‍රදේශයේ නිවසක දැල්වෙමින් පැවැති ගෑස් ලිපක්ද ඊයේ පස්වරුවේ පිපිරීමකට ලක්වුණි.

මීගොඩ, පානළුව සම්පත් මාවතේ නිවසක සිදුවූ ගෑස් කාන්දුවක් හේතුවෙන් බියට පත් නිවැසියන් සිලින්ඩරයේ ගෑස් අවසන් වනතුරු නිවසින් පිටතට වී සිටි පුවතක් ද අපට වාර්තා වුණි.

මාතර පොල්හේන ප්‍රදේශයේ නිවසක තිබූ ගෑස් සිලින්ඩරයක් නිවසෙන් පිටත රැඳවීමට නිවැසියන් කටයුතු කළත් එම සිලින්ඩරයේ වෑල්වයෙන් ඊයේ රාත්‍රියේ ගින්නක් හටගෙන තිබේ.
$ads={2}
පසුව ප්‍රදේශවාසීන් එක්වී ගින්න නිවාදැමීමට පියවර ගෙන තිබුණි.

පවතින වාතාවරණය යටතේ ගම්පොළ හා පුස්සැල්ලාව, පේරාදෙණිය බෝවලවත්ත, මහවලවත්ත යන ප්‍රදේශවල පදිංචිකරුවන් ද සිලින්ඩර නිවසෙන් පිටත රැඳවීමට පියවර ගෙන තිබුණි.

මේ අතර අද පෙරවරුවේ පානදුර පිංවත්ත ප්‍රදේශයේ ගෑස් අලෙවිසැල් 2කින් ලබාගත් සිලින්ඩර 2කින්ම ගෑස් කාන්දු වන බව ගෑස් පාරිභෝගිකයින් චෝදනා කර තිබේ.

පසුව එම සිලින්ඩර 2ක ඒවා මිලදී ගත් අලෙවි නියෝජිතයින්ට යළි භාරදීමට උත්සහ කළත් ඔවුන් ඒවා භාරගැනීම ප්‍රතික්ෂේප කර ඇත.

ඒ පිළිබඳව පිංවත්ත පොලිස් ස්ථානයට පැමිණිලි කිරීමට ද ගෑස් පාරිභෝගිකයින් දෙදෙනා කටයුතු කර තිබේ.

මේ අතර කිරම, යද්දෙහිගොඩ ප්‍රදේශයේ නිවසකට මසකට පමණ පෙර ගෙන ආ ගෑස් සිලින්ඩරයක් භාවිතයට ගෙන තිබුණේ ඊයේ දිනයේදීය.

නමුත් එම අවස්ථාවේදී සිලින්ඩරය තුළ ගෑස් නොමැති බව අනාවරණ වුණි.

මේ අතර ගෑස් සිලින්ඩරයක් නිසි අයුරින් භාවිත කිරීම පිළිබඳව පෙරහුරුවක් ලිට්‍රො ගැස් සමාගම විසින් අද කොළඹදී පැවැත්වනු ලැබීය.

ඇල්පිටිය ඩිපෝව පාරේ නිවසක ගෑස් සිලින්ඩරයක රෙගියුලේටරයක් පුපුරායාමෙන් පසු, ගෙන එන ලද තවත් ගෑස් සිලින්ඩරයක කාන්දුවක් හටගෙන තිබේ.

අහුංගල්ල වැලිකන්ද ප්‍රදේශයේ නිවසක අද පස්වරුවේ ගෑස් ලිපක් පුපුරායාමෙන් පුද්ගලයෙකු තුවාල ලබා තිබුණි.

දියතලාව දොඩම්වත්ත මහවත්ත ප්‍රදේශයේ නිවසක ද ගෑස් ලිපක් පුපුරායාමේ සිද්ධියක් වාර්තා විය.

නිට්ටඹුව උදම්මිට ප්‍රදේශයේ නිවසකද අද පස්වරුවේ ගෑස් ලිපක් පුපුරා ගොස් තිබුණි.

කොලොන්න කැම්පනේ උතුර ප්‍රදේශයේ නිවසක ගැස් නළයක් පුපුරාගොස් තිබූ සිද්ධියක් ද වාර්තා විය.

මේ අතර කඩුගන්නාව බලන ප්‍රදේශයේ නිවසකද ඊයේ පස්වරුවේ ගෑස් ලිපක් පුපුරායාමේ සිද්ධියක් වාර්තා වී තිබුණි.

මේ අතර සමගි ජන බලවේගයේ පාර්ලිමේන්තු මන්ත්‍රිවරුන් පිරිසක් අද පස්වරුවේ ශ්‍රී ලංකා ප්‍රමිති කාර්යාංශයට පැමිණ තිබුණි.

ඒ වෙළෙඳපොළේ පවතින ගෑස් සිලින්ඩර නිසි ප්‍රමිතියෙන් යුතුව පවතින්නේදැයි පිළිබඳව පරික්ෂාවක් කරන ලෙස ඉල්ලමින්ය.

ඔබේ ප්‍රතිචාරය කුමක්ද ?

ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් පළ කරන්න

Post a Comment (0)
Previous Post Next Post